Ayyuz nem a Tamazight
n Fatima Tabaâmrante

Ayyuz nem a tamazight llighen lkkmn,
Izûran nem ghid agh sul llan waman.
Felnkmin midn gh lbur felna-mn irafan.
Mac ! nessfeld iwida-ym ittinin nâam.
Arraw-nem a tamazight a sserm ittellin,
imarratn ay jjenjenm tilli fertlnin.
A-gighen situn rebbi a lhêrf n tifinagh
Menck n tasut addark gh wussan nnun
Ya wzemz rcem ntzerbay kaghak n ttanay
Ullah ar-figh ayyuz ighwi llitn yufan
A-ghinna ghyad illa zây gh illa mat issenn.

Tamazight ura tsiggil s lhûqquq n yan
Lhâq ns asa tsiggil mani kullu kkan ?
Imik ur d ighama gis mani-tn yiwin
A willi nga gh jjenb inw a-fella yurrin.
Gh ass lli nbrra gh lhul yak nmun ukan
Ur bdîn izmmuzâl gh ugharas negh
Ghass lli gh yufa azemz imhî lûtrt negh.
Ûddrn agh kullu lmdars lli gha ttaragh
Ula ghid ghasflidegh kullu lâhiyit.
Igh ira kra agh iîb igh sawelgh nnighas:
Ad gin ixf-ns ghid agh nit ukan lligh
A yissen man ssebr gingh isen ur ifil
Tillid nkwti kayad ajj tilli kullu tugh.
Nttemri gh uqcab aghruc ar agh ikkat
Imttâwn llid îdrn tasa a-tn yallan.

Iwa a tawtemt Tamazight a talli yusin
Arraw iggi n wafud-ns ara sent mmala,
Ad akw izwarn d Tmazight melt i yiwim.

Illa ma yas innan ajj afrux-an îherc
Igh as nemla Tamazight ira ghar itelf
Ass nna gh rûhn lmderst ur issin awal
Ghikk ad iga tabbayt u wawal.
Imma tighri terxa dar wanna tent iran
Igh îhrc warraw mzzin rxan a yissen.
Ilazm kullu mad ikcemn i wamur negh
Akwnt issen a Tamazight ar km isawal
Imma ighd ayt ghi han wanna-t ur issen
Lhâq nes ay ijla d lhâq u warraw-ns.

A tbbimt a Tamazight akal ula aman
A willi n dim temaggarn ayyit ittinin
A tlkemt a Tamazight afa ammu kem righ
An ukan gis tbiddmt yanni kem kuyan.
Rad nefl tagûdi-nem a tent ur awigh
Ur nderk ayyi zzenzent ass nna nemmut
Amin aygh ig rebbi gh tenfit laman...